Unser Sujet

Halbiere statt regiere

Mir laufe als halb feritgi Pierots.
Für e ganzi Larve und e fertigs Kostüm hets is nid glängt

Will aim halt kaine ebbis schänggt,
het‘s is daas Joor nur fir d‘Helfti glänggt.
Vo dr Zyt häär hättis kenne basse,
doch is fäält‘s e weenig in dr Kasse.
Drum isch s‘Goschdym nit ganz fettig
und au fir d‘Larve gits kai Rettig.
Mir steen als halbi Pierrot uf dr Gass
und wenn‘s räägnet wärde mir halb nass,
denn au d‘Räägebelleryyne isch halbiert.
D‘Ladärne isch zer Helfti farbig und laggiert,
will unser Mooler so vyyl koschtet und kassiert.
So wie dr Schugger, wo si Auti falsch parkiert,
dien mir nid blääche. Mir wüsste nid mit waas!
Opti- oder Phessimischt, s‘het nimmi gnueg im Glaas!

Fir drey Dääg gheere alli wo bi uns faasnächtle
zu de ächte Baselstetter, nur dr Räschde
vo dr Zyt sin sichr d‘Helfti woonhaft ufem Land
und wäär Zytig liist, waiss gnau s‘ligt uf dr Hand,
dass Rambasse spaare dien bi dr Bildig und Kultuur.
Die maischde hänn im Kopf jetzt s‘Bild vom stuure Buur.
Dä hoggt e Krummi rauchend uf sim Draggtoor
und maint, si renne jo mit Fyyr dur s‘Stadtdoor,
denn isch doch das scho gnueg Kultur, das länggt.
Und au dr Stutz vo Basel wänn si nit‘mool gschänggt.
Denn am Änd mecht d‘Stadt das Gäld au wiider zrugg,
finanziere gwiss drmit s‘Theater, wo si fiidle blutt
iiber d‘Biini seggle, schreiend als wäär Brunschtzyt!
Das mecht kaine gsee, denn do goot d‘Kunscht z‘wyt.

S‘Druurige an dääre Gschicht vo gstrich‘ne Gälder,
s‘isch ebbä nid d‘Idee vo iirgendem‘ne Hinterwäldler
oder gar vo staizytlige riise Deppe.
Nai, es sin d‘Regierigsreet, wo do derhinder stegge!
An e Styyrerheeig wänn die gar nit dängge,
schiebe‘s lieber au no uf d‘Studänte,
das sige alles ainewääg nur laami Änte,
traage nie nyt bii zer Ländler-Ränte!
Denn mit Griechisch, Gschicht und Soziologii
finde die kai Schtell und wärde Arbetsloosi si.
Drum darf me dert rueig d‘Unterstitzig striiche!
Und au s‘Drämmli isch halt nur no fir die Riiche,
numme die vermeege sich e U-Abo no z‘kauffe,
dr Räschd blibt halt dehaim oder soll lauffe

Vom Inhalt häär, do kennt I zwar no wyter raime,
doch i heer jetzt uf dermit, denn‘s zaalt‘s mir kaine!
Mi miggrig Loon längt nidmol fir e Schluss-Pointe…