Unser Sujet

Mir gedängge de letschte Häggse, wo in Basel versänggt wurde sin. Mit ere Gedänggtafele söll an die erinneret wärde. Disjoor sin mir zämme mit de Muschgetnüssli gloffe.

HÄXE Im Gedängge ans Versängge Erschti Szeene: Käppelijoch; Määntig kurz vor de Viere Uffdritt zwai Häxe «Soo dräffe mir Drei is doo erneit, Obs gwitteret, obs haaglet oder schneit.» «Zwai» «Was? wie?! Verzell nit sone Saich, Kurz vor de Viere, vorem Morgestraich, Wie allewyyl…» «Ebbe nid, hyyr numme z’Zwait!» «Worum? Das Datum stoot doch syt’re Eewigkait!» «Jä waisch no nyt vo däären Yronyy? Die Dritt im Bund isch nimmi doo derbyy. Lang het si sich voor em Peebel versteggt, Laider isch s Lotti emänd glyych verreggt. Ooni Liecht isch si doo aane gflooge, Z Mulhouse denn, es isch nid glooge, Hets se sammt Bääse in e Turbiine gsooge. «Ha iire immer gsait, si soll um d’Aaflugschnaise E groosse Booge mache bim do aane Raise. D Waarnige hän schyynbaar weenig gnutzt, Jetz hets am Änd das schduure Beeri butzt. Mir sin em Sänsemaa e männgmol numme gnapp Drvoo koo. Waisch no sällmol s dumme Pagg, Die bleede Kiircheveegel, ze de alte Zytte? «Hejoo, Doozemool het men e männgi Grytte, Als ‚Häggs’ beschumpfe und drnoo, Mit Stai am Gnigg dr Bach ab gloo. Hunderti so ‚Häggse’ sin im Ryy versoffe, Mainsch es het jee en ächti droffe?» «Nai, y glaub das ischne kaimol glunge, Die hänn doch schlicht und aifach gspunne. Hänn gmaint, in Fraue steggi s puure Beese, Wenn si uf schlaui Art Brobleem dien leese. Oder wenn mol aini ebbis anderscht dänggt, No wird si gjaggt und denn an Galge ghänggt. Aber waisch au hit – alles fremde oder neie, Dien si verdeifle, in ai Dopf dryy keie.» «D Mensche blyybe halt allewyyl die glyyche, Uss Angscht styyge si no gäärn iiber Lyyche, Die Angscht han ych scho efters gnutzt, Und myyne Konkurränte d Fliigel gstutzt, Es längt e Muem, und e Zaig mim Finger, Dr Mensch machts denn vo sälber schlimmer, Am Ändi winscht äär au sym Frind dr Doot, Eerscht, wenn s letschte Stindli schloot…» «Denn isch fir s Bereie lengschdens z’spoot. Die Gaischter, wo si rieffe, wärde si nimm loos Und mi Schaadefraid isch jewyyls riisig groos. So Maniplatione und Intriige mache aim scho Spass, Aber loos – Wänn mir nit langsam mol uf d Gass? Y mechd mini Faasnachtsfeerie zelebriere, Am beschde mit’re glatte Glygge mit marschiere. Lueg, dert bi dääne wurde mir guet yyne basse. Die gseen jo us wie mir, y kas kuum fasse. Alles Häggse, spitzi Hiet und d Naase krumm, Bi dääne kunnt is sicher kaine dumm. Mir mische is jetz aifach drunter, kumm!» D Häxe verschwinde Zwaiti Szeene: Minschterblatz; Donschtig kurz vor de Viere Die zwai Häxe drätten uff «Wenn dräffe mir Drei is doo erneit? Wenn s gwitteret, haaglet oder schneit?» «Zwai» «Wie? Stimmt hesch nadyyrlig rächt. E alti Gwoonet stirbt halt ebä schlächt! Aber scheen ischs gsii, wie jeedes Joor. Wie allewyyl bestoot zem Glygg kai Gfoor, Dass me is bi all däm Truubel do erkennt Und wennscho! Häggse wärde nimm verbrennt!» «Au wäärde nimmi Kepf abdrennt, Und ainewääg wänn d Mensche Kepf gsee rolle, Wenn si maine d Lyt dien anderscht als si solle. D Brobleem sinn denn au schnällschtens gfunde, Dr Sindebogg duur d Medie gschunde, Bis dää denn zletscht sy Gsicht verliert, Mit gsänggtem Haupt drvoo marschiert, Und Blatz macht fir dr neggschti Haini, Wo verbisse bhaupted, äär wäär dr Aini, Und braav de Mensche Winsch erfillt, Bis s Volgg au iim dr Hals umdrillt.» «Hesch jo rächd, doch loss is nimmi wyter gleene, Mir gniesse lieber noone bitzli d Faasnachtsszeene Und dien denn speeter wiider d Lyt verheene» E Daagwacht uss em Hintergrund «Lueg, dr Ändstaich isch jetz au scho duure. Y flieg haim go loose, was är dumms duet schnuure, Mi Maa dr Preesi – Dää hani guet ins Amt buggsiert, Vo wo us jetz dä Depp die ganzi Wält fruschtriert.» «Y muess jetz au scho wyter springe, Em aint und ander’ e Bloog go bringe. Esoo bring ych my Konkurränz in Noot, Und kumm duur das in Bundesroot. Willsch di au amysiere, lueg d SRF Areena.» «Hejo, das mach y sälbschtverständlig, gaar kai Teema! Kumm guet haim!» «Du au, tschau Melania.» «Sali Magdalena!» E Daagwacht; D Häxe zien ab