Z‘Basel uff dr Brugg steen Lyt und gaffe,
zeige mitem Finger, wie im Zolli bi de Affe.
Die ainte joomere und die andere lache.
Alli dien ganz flissig mit de Händis Fotti mache.
Me frogt sich, hän denn die nyt z‘schaffe?
Es isch e nadyyrlig Gsetz: Duets neyme krache,
lärme, dätsche, explodiere oder schreie,
leen automatisch uss Refläx grad alli alles gheie,
Springe zum Spektakel, damit me‘s joo au mitbekunnt.
In däm Fall isch die Mittleri Brugg dr Mittelpunkt.
Dert, ganz in dr Neechy vo dr Ländi
Findet s‘Styyrhuus vomene Schiff si Ändi.
Denn dä Schlappe het zer Fraid vom Bublikum,
s‘Hyysli nid igfaare und mit Schwung
s‘ganze Dach entlang em Bruggebooge
mit eim Radau dert drunter gschoobe
und so s‘Disain ganz brachial ney gstalte.
So wärde z‘ Basel Schiffli gfalte.
Jetzt goot s‘freelig Spekuliere loos
Wieso e Schiff so naime iine stoost.
Sins d‘ Dimensione vo dr Brugg?
Die mache d‘ Schiffaart jo scho lang verruggt.
S‘Dräffe vo dr änge Durchfahrt goot
nur mit dr Hilf vom Echoloot
und vom Expärt, wo navigiert.
S‘seig e Wunder, dass nid mee passiert.
Isch‘s ächtscht so wit koo wägem Floos?
Dr Käpten het nid uffpasst, sondern gloost.
Uf dr Biini isch grad ebbis fäzzigs gloffe.
Oder isch dr Käpten eppe bsoffe
hintrem Styyrraad gstande und het gschwanggt.
Het är im Haafe nid gnueg tanggt?
Wil s‘Benzin so dyyr isch het är nid ganz gfillt.
Hän dorum d‘Schruube nimme drillt?
Drum het s‘Boot nit vorhär kenne halte.
So wärde z‘Basel Schiffli gfalte.
Me kennt no lang go räätsle und studiere
Und s‘wärde hunderti vo Gricht kursiere.
Zem Dail do wärde Raibergschichde uffdischt,
dass dr Käpten uf dr Flucht isch.
Oder d‘ Mannschaft seig jetzt arbetsloos,
Steen mit Akordeon entlang dr Stroos.
Dr Käpten trifft‘s zem Gligg nid schweer
Syt neischtem fahrt är uf em Mittelmeer
Mit grosse Schiff macht är jetzt Faarte.
Versuecht dert prompt mol uf de Klippe z‘parke
und versänggt sis neye Boot d‘ Concordia.
So foot die ganzi Gschicht vo vorne aa.
S‘isch alles Seemannsgarn und gar nyt woor.
Doch zwischeduure kunnt‘s mol voor
und s‘het im Kaabis doch e ganz glai Stugg
Woored und die hoolt uns uff dr Boode zrugg.
Si zeigt uns, s‘blibt doch allewyyl bim alte.
Do z‘Basel wärde d‘Schiffli gfalte.