Unser Sujet

Mir renoviere Mir renoviere, und zwar alles, sig das d Clique oder unsere Chäller.

Mir renowiere und zwar d’Glygge.
S goot is nym so guet, wie zue de beschte Zytte.
Mir wärde elter und mir saage das ganz eerlig,
Dr Luuskaibebstand schrumpft langsam gfeerlig.
S wird ghinggt und ghueschtet und au d Bumpi,
Do ka me s’Läbelang au no so Gsund syy,
S kunnt dr Daag, do maag die aifach nimm.
Das gheert drzue, wär aigedlig nit schlimm,
Doch mir mechte gärn, dass so lang wie s goot,
Unseri glaini Glygge wyterhii bestoot.
Damit das glappt, isch ebe renowiere aagsait,
Mien attraggtyyv syy, wiene Miggeli im Baadglaid
Doorum pagge mir graad d’Gläägehait bim Schopf
Und erneiere jetz zallereerscht dr Kopf.
Spritze Bootox, glette Runzle, färbe d’Hoor
Und ums Ummeluege buurzle d’Joor.
Albe neetig hätts nit elai d’Fasaade,
S kennts au dr Verstand e weeneli vertraage.
Doch zu däm isch no e männge nit berait,
Was s’aggtuelle Gschee is graad dytlig zaigt:
In Amerikaa hänn si glache und hänn gsait,
Dr Trump isch schangseloos, dä liederligi Kaib.
Lueg, jetze hoggt är deerte in dr Wysse Hitte,
Mitsammt Dupee und importierter Schnitte.
Macht mit em Putin ain uf digge Kumpel
Und alli luege zue, wie jetz dä Tschumpel
Ooni iberleege, wils em graad am Botsch juggt,
Is alli mit aim glaine Gnopfdrugg
Zrugg in d’Staizyt bombe kennt.
Das ganze Volgg, wo uf d’Stroosse rennt,
Miesst nit an dääne Deemos umme duurne,
Wäre alli, wie’s sich gheert, an d’Uurne.
S’gliich Gschmeis hänn nit nur die dert ääne,
Im gross Kantoon verdruggt sich s’Angela e Drääne.
Wil si wäge dääne bleede Inselaffe
S gainigte Eiroopa nimmi ka erschaffe.
Si hets jo au nit glaubt, dass das jee basiert,
Jetz het si halt e Feyyeli kassiert.
Au in iirer aigne Haimed briele d’Bopulischde.
Die bruune Veegel wurde gärn go mischte.
D’Flichtling uuse, d’Gränze zue,
Si blagiere, denne wäri ändlig Rue
Vom fremdä Gsindel usem Oriänt.
Si kemme au in d’Schwyz ganz ooni Änd!
Therrorischte, Bombeleeger, iibli Gsellä
Und au d’Soziaalfäll kenntisch nimmi zellä.
Iiberfremdig, Unterdruggig vo de Fraue,
S’aifachscht wär e Muure z’baue.
Allewyyl und iiberaal die gliiche Ängscht,
Si sin zwar nit reaal die Gspängscht.
Gäll, in de Kepf vo männge Lyt,
Bi dääne isch am Ändi nyt,
Usser d’Soorg um s’aigne Wool.
S’Häärz fir andri, das blybt laider hool.
Die renowiere nit, si schuufle an de alte Grääbe.
Doch au bi dääne isches noni ganz vergääbe.
E frische Wind kennt ainiges entfalte,
Dradizioone ka me ainewääg erhalte.
S’beschte Byspiil, lueg mol d’Fasnacht aa.
Me mecht am Goorteesch ebbis z’lache haa,
Gueti Unterhaltig, ebbis scheens zem Luege,
In de Goschdyym Bebbimaitli oder Bebbibuebe,
Scho sit si Binggis sin am Drummle oder Pfiffe,
Wo jeedes Joor an ebbis Neiem schliffe.
Me muess offe syy, zem Neis probiere,
Denn nur eso kasch richtig renowiere.
Doorum dien miir d’Eermel uffe litze,
Steen uff und bliibe nimmi lenger sitze.